Павлодар облысында көліктерді арнайы мобильдік бекеттер бақылайтын болды

ПАВЛОДАР. ҚазАқпарат - Павлодар облысында көліктерді тексеруге арналған жаңа мобильдік бекеттер қойылды, деп хабарлайды ҚазАқпарат тілшісі өңір әкімінің баспасөз қызметіне сілтеме жасап.

Инспекторлар жүк көліктері көп жүретін жолдарда жұмыс жасайтын болады. Көліктер бөлімшеге жіберілмес бұрын Павлодар облысының әкіміне таныстырылды. Өңір басшысының бастамасымен үш арнайы көлік сатып алынды. Mercedes-Benz маркалы автокөліктері көліктік бақылау қызметкерлері жүк көлігінің жүкті шамадан тыс тасымалдамауын шұғыл тексеру үшін арнайы жасақталған. Жылжымалы таразылар бір жүк көлігін екі-үш минуттан артық тексермеуге мүмкіндік береді.


«Қызметкерлеріміз жүктің шамадан тыс көп екенін анықтйтын болса, әкімшілік материал тағайындайды. Жеке тұлғаларға 50 АЕК, заңды тұлғаларға - 200 АЕК-ге дейін айыппұл салынады», - деді Павлодар облысы бойынша Көліктік бақылау жөніндегі инспекция басшысы Серік Талдыбаев.



«Алғашқы күні-ақ мобильдік бекеттерде шамасынан тыс жүк тиеген көліктер анықталды. Қалқаман кентіне жақын жолда кузовта 36 тонна бетон тиеген Howo жүк көлігі тоқтатылды. Ал көліктің жүк көтергіштігі - небары 16 тонна. 20 тоннаға дейін жүк тасымалдағаны үшін көлік иесіне 430 мың теңгеге дейін айыппұл салынуы мүмкін», - деді Павлодар облысы әкімінің баспасөз қызметіндегілер.



Павлодар облысы әкімі Болат Бақауовтың айтуынша, өңірдегі жол тәртібінің сақталуын көліктік бақылау инспекциясы қызметкерлерімен бірге жергілікті полиция қызметі мен көліктік прокуратура бақылауы тиіс.