Павлодар облысында 58 жүргізуші көлігіне жалған нөмір тағып алған

ПАВЛОДАР. ҚазАқпарат – Павлодар облысында биылғы жыл басынан бері көлігіне жалған мемлекеттік тіркеу нөмірін тағып алған 58 жүргізуші анықталды, деп хабарлайды ҚазАқпарат Polisia.kz сайтына сілтеме жасап.

«Аталған бұзушылық ҚР ӘҚБтК 590-бабының 4-бөлігінде қарастырылған. Бұл, 20 АЕК мөлшерінде (58 340 теңге) айыппұл салуға немесе бір жыл мерзімге көлік құралдарын басқару құқығынан айыруға әкеп соғады», – деді Павлодар облысы Полиция департаменті жергілікті полиция қызметі басқармасының бастығы Ғалым Сарғұлов.

Мысалға, Павлодар қаласында сағат 22:00-де Торайғыров көшесін патрульдеу кезінде полиция қызметкерлері маневр жасау ережелерін бұзғаны үшін Toyota автокөлігінің жүргізушісін тоқтатқан. Жүргізуші ҚР ӘҚБтК 595-бабының талаптарын бұзған.

«Құжаттарды тексеру кезінде жүргізуші көлігіне жалған мемлекеттік тіркеу нөмірлік белгілерін орнатқаны анықталды. Аталған факті бойынша ҚР ӘҚБтК-нің 590-бабы 4-бөлігімен әкімшілік іс қозғалды. Материал шешім қабылдау үшін мамандандырылған әкімшілік сотқа жіберілді. Автокөлік айып тұрағына жеткізілді», - делінген мәліметте.