Павлодар облысы Өзбекстанға 11 мың тонна картоп экспорттады

ПАВЛОДАР. ҚазАқпарат - 2018 жылы Павлодар облысында ауыл шаруашылық өнімдері бойынша эскпорт көлемі артқан. Бұл туралы ауыл шаруашылығы басқармасы басшысының міндетін атқарушы Марлен Оспанов мәлім етті, деп хабарлайды pavlodarnews.kz.

«Өңірімізде былтыр 146 мың тонна өнім экспортталған. Биыл экспорттың 33 пайызын - бидай, 20 пайызын - картоп алды. Жыл басынан бері Қытайға 9 мың тонадан астам майлы дәндер жіберілсе, «Абай» шаруа қожалығы бір рет Біріккен Араб Әмірліктеріне қой етін жіберді. Экспорттың көбі Орталық Азия елдеріне асырылады. Атап айтқанда, Қырғызстан, Өзбекстан елдерімен қатар Ресей, Ауғанстан, Грузия мемлекеттері бар»,- деді Марлен Оспанов.

Облыстық ауыл шаруашылығы басқармасы ауыл шаруашылығы өнімдерін дайындау және қайта өңдеу бөлімінің бас маманы Айдана Бейсекееваның айтуынша, павлодарлық картоп Ресейде жоғары бағаланады.

«Биыл 509 тоннадан астам картоп жиналды. Өнімділік гектарына 292 тоннаны құрады. Ресейде біздің картопқа деген сұраныс жоғары. Жыл басынан бері 1,5 тонна картоп жіберілді. Жыл соңына дейін тағы 10 мың тонна жіберу жоспарлануда», -дейді Айдана Бейсекеева.

 Жалпы картопты Ресей күз айларынд, ал ақпан-наурыз айларында Өзбекстан алады. Осы жылы Өзбекстанға 11 мың тонна экспортталды. Сонымен қатар, бақша дақылдарының 80 түрін өсіретін «Қайрат» шаруа қожалығы Ресейге 188 тонна қарбыз жөнелткен. Былтырғы жылмен салыстырғанда экспорт 10-15 пайызға жоғарылап отыр.