Павлодар көшелерінде 100-ге жуық тіл заңнамасын бұзу фактісі анықталды
Қаланың мәдениет және тілдерді дамыту бөлімі көрнекі ақпарат құралдарының заңнама талаптарына сәйкестігіне тұрақты түрде мониторинг жүргізеді. Мониторинг кезінде қарапайым ережелердің сақталуы тексеріледі: ақпарат міндетті түрде мемлекеттік және орыс тілдерінде болуы, мәтіннің дұрыс орналасуы, қатесіз болуы және мағынасын бұрмаламау.
- Биыл сәуір-мамыр айларында Назарбаев даңғылы, М.Жүсіп, Қайырбаев, Бұқар жырау, Едіге би сияқты ірі көшелерге 10 мәрте мониторинг жүргізілді. Нәтижесінде 97 заң бұзушылық фактісі анықталды. Ең жиі кездесетін қателіктер - маңдайшалар, прейскуранттар тек орыс тілінде жазылған, сондай-ақ қазақ тілінен қате аударылған және грамматикалық қателер. Біздің басты міндетіміз – кәсіпкерлерді жазалау емес, тіл заңнамасын сақтау бойынша кеңес беру, - деді бөлімнің бас маманы Ілияс Серім.
Айта кетейік, көрнекі құралдардағы анықталған қателіктерді түзету үшін 3 күннен 15 күнге дейін уақыт беріледі. Егер аталмыш заң бұзушылық біл жыл ішінде 2-3 мәрте қайталанса 5-тен 25 АЕК-ке дейін айыппұл салынады.