Парламент сайлауында тергеу изоляторындағы 5 мың адам дауыс береді
«Қазақстан Республикасындағы сайлау туралы» Конституциялық заңға сәйкес тергеу изоляторларында ұсталатын, үкімі заңды күшіне енбеген еліміз азаматтары жалпыға бірдей сайлау құқығына ие.
Осы ретте, қазір тергеу-қамауында отырған республиканың қылмыстық-атқару жүйесінің 16 тергеу изоляторында жабық сайлау учаскелері құрылды.
«Онда 5 мыңнан астам адам Қазақстан Республикасының кезекті Парламенттік сайлауында дауыс беруге қатысып жатыр.
Сайлау процесі өтетін орындарда тиісті бақылау, күзет және қадағалау қамтамасыз етілген.
Сайлау процесіне қатысушылар барлық қажетті санитариялық-эпидемияға қарсы талаптарды сақтауда.
Биылғы 5 қаңтардағы жағдай бойынша «қызыл» және «сары» аймақтарда болған өңірлерде сайлау комиссиясының барлық мүшелері, оның ішінде байқаушылар алдын ала ПТР-әдісімен COVID-19-ға зертханалық тексеруден өтті.
Сонымен қатар, жабық сайлау учаскелеріне кіру тергеу изоляторларының қызметін регламенттейтін нормативтік құқықтық актілерге және «Қазақстан Республикасындағы сайлау туралы» Конституциялық заңына сәйкес жүргізілді», - деді ҚР ІІМ Қылмыстық-атқару жүйесі комитетінен.
Мәлім етілгендей, қазіргі уақытта республиканың тергеу изоляторларында 5 мыңнан астам адам бар.