Парламент 11 халықаралық шарт пен мемлекетаралық келісімді ратификациялады – Мәжіліс төрағасы

None
АСТАНА. ҚазАқпарат – Парламенттің жалпы отырыстарын телеарналарда тікелей эфирде көрсету бастамасын жұртшылық жақсы қабылдап жатыр. Бұл туралы қос палатаның отырысында Мәжіліс төрағасы Ерлан Қошанов айтты, деп хабарлайды ҚазАқпарат тілшісі.

«Мемлекет басшысының «Күшті Президент – ықпалды Парламент – есеп беретін Үкімет» формуласы аясында Мәжілістің өкілеттігі, бақылаушылық функциясы күшейтілді. Президент айтқандай, біз бюджеттің атқарылуы барысын, әрбір тиынның жұмсалуын қатаң қадағалауымыз қажет. Осыған орай Жоғары аудиторлық палатаның есебін тыңдадық. Онда халықты толғандыратын ең өзекті тақырып – жылумен қамту мәселесі көтерілді. Қоғамды, депутаттарды жылу орталықтарының қысқы маусымға дайындығы алаңдатып отыр. Осы жөнінде біраз сыни пікірлер айтылды. Нәтижесінде Үкімет пен Жоғары аудиторлық палатаға тиісті ұсынымдар жолданды», - деді Е. Қошанов.

Палата спикерінің айтуынша, Мәжілістің келесі есебі мемлекеттік қарыз тақырыбына арналады. Осы тақырып алдағы сессияда талқыланбақ.

«Сонымен қатар депутаттар халықаралық шарттар мен келісімдердің отандық базасын қалыптастыруға баса мән берді. Парламент 11 халықаралық шарт пен мемлекетаралық келісімді ратификациялады. Заң шығару саласындағы біздің барлық жұмысымыз қоғам үшін ашық екенін ерекше атап өткім келеді. Осы сессияда, Мемлекет басшысының тапсырмасына сәйкес, Парламенттің қос палатасы жалпы отырыстарды «Хабар 24» телеарнасында тікелей эфирде көрсетуге көшті. Сондай-ақ Мәжілістің жалпы отырысы «Жібек жолы» телеарнасынан көрсетіліп келеді. Бұл бастаманы жұртшылық жақсы қабылдап жатыр», - деді Мәжіліс төрағасы.

Бұдан бұрын хабарланғандай, бүгін Парламент палаталарының бірлескен отырысы өтіп, онда сегізінші сайланған Парламенттің бірінші сессиясы ресми түрде жабылды.

Депутаттар биылғы 1 қыркүйекке дейін парламенттік каникул деп жарияланатыны туралы арнайы қаулы қабылдады.


Соңғы жаңалықтар