Паркинсон ауруын ультрадыбыспен емдейтін аппарат сатып аламыз – Серік Ақшолақов
2022 жылғы 1 шілде 13:15

Паркинсон ауруын ультрадыбыспен емдейтін аппарат сатып аламыз – Серік Ақшолақов

НҰР-СҰЛТАН. ҚазАқпарат – Ұлттық нейрохирургия орталығы Үкіметтен паркинсон ауруын ултрадыбыспен емдейтін жаңа аппарат сатып алуға қаражат сұрап отыр. Бұл туралы орталықтың басқарма төрағасы Серік Ақшолақов мәлім етті, деп хабарлайды ҚазАқпарат тілшісі.

«Медицина саласы бір орнында тұрмайды. Бүгінгі жақсы заманауи технология бір жылдан кейін озық технология болмай қалуы мүмкін. Сондықтан Үкіметке өз ұсыныстарымызды беріп отырамыз. Соның арқасында біздің орталықтың технологиясы Еуропаның клиникаларынан қалыспайды. Қазір функционалдық аураларды, паркинсон ауруын ультрадыбыспен емдейтін жаңа аппараттар шығып жатыр. Ол туралы мен Үкіметте сөз қозғадым. Қолдау тапты деп айта алам. Ол қолдаудың іске асуы үшін уақыт керек. Ол жағынан толық қолдау бар»,- деді нейрохирург елордада өтіп жатқан халықаралық форумның кулуарында.

Айтуынша, ол басқаратын мекеме 14 жылда 35 мың күрделі ота жасаған. Соның арқасында бұрын тек шетелде емделетін науқастар Қазақстанда ауруын еңсеруге мүмкіндік алған.

«Ұлттық нейрохирургия орталығы жұмысын бастаған 14 жылдың ішінде 35 мыңдай ота жасадық. Соның 95 пайызы халық үшін тегін жасалды. Яғни, қазақстандықтар үшін толығымен тегін, квота арқылы істеледі. Қазір бізге шетелден де келетін емделушілер бар. Медициналық сақтандыру арқылы ота жасатушылар да бар. Солардың ішінде ең қымбаты –ми қантамырларына жасалатын ота. Оның құнын да қазақстандықтар үшін мемлекет төлейді», - деді Серік Ақшолақов.

Айта кетейік, бүгін елордада Халықаралық нейрохирургия форумы өтіп жатыр.


Ұқсас жаңалықтар
Серіктестер жаңалықтары

Jańalyqtar

Үрдіс

MURAǴAT