Панфилов ауданында жүгері жинау науқаны басталды
Панфилов ауданы әкімінің баспасөз қызметінің мәліметінше, биыл алқапты өңірде құрғақшылық болса да өткен жылғыдан 124 гектарға артық өнім жиналмақ. 70 гектар алқабы күйіп кеткен дақылды аймақтан диқандар бүгінде әр гектарына 64,1 центр жүгері алуды жоспарлап отыр. Жалпы шаруалар 26059 гектар алқаптан 167,3 тонна сары дақылды қоймаға баспақ.
«Биылғы жылы пандемияның диқандарға кері әсері болмады. Өйткені мемлекеттік бағдарламамен жеңілдік тоқтаған жоқ. Керісінше шаруа қожалықтарына жақсы қолдау көрсетілді. Бергісі біздің ауданға 380 тонна дизель отыны беріліп, төмен бағамен сатылды»,-дейді аудандық ауыл шаруашылық бөлімінің басшысы Жұмағазы Наймантаев.
Жыл басынан бері бүгінге дейін ауыл шаруашылық саласына 1 млрд 20 млн теңгеге инвестиция тартылып, 48 дана техника сатып алынған.
«Аграрлық несие корпорациясы» АҚ арқылы 5 шаруа қожалығы жеңілдікпен 305 млн 955 мың теңгенің несиесін алса, 44 жеке серіктестік иелеріне 142,4 млн соманың жеңілдігімен қаржылай қолдау көрсетілген», - делінген ведомствоның таратқан ақпаратында.