Өзбекстаннан Қазақстанға 20 келі героин өткізбек болғандар ұсталды

ТАШКЕНТ. ҚазАқпарат – Өзбекстаннан Қазақстанға 20 келіден астам героин өткізбек болғандар ұсталды, деп хабарлайды «ҚазАқпарат» ХАА-ның меншікті тілшісі.

«ӨзА» сайтының хабарлауынша, Өзбекстан Мемлекеттік қауіпсіздік қызметінің Сырдария облыстық басқармасының қызметкерлері жүргізген жедел шаралардың арқасында Тәжікстаннан Өзбекстан арқылы Қазақстанға көп мөлшерде есірткі өткізбек болғандар ұсталды.

Тәжікстан азаматы есірткіні контрабанда жолымен Өзбекстанға кіргізіп, Ташкентте тұратын танысының үйінде сақтаған.

Өзбекстанның арнаулы қызметтерінің деректеріне сүйенсек, есірткі транзитін ұйымдастырған – Қазақстан азаматы, Түркістан облысының тұрғыны. Ол Сырдария облысының айналма жолы арқылы елімізге есірткі кіргізбек болған жерінен ұсталды.

Сараптама нәтижесінде айғақ ретінде алынған зат героин екені анықталды. Салмағы 20 келі 32 грамм. Мамандардың сөзіне қарағанда, тәркіленген героиннің бағасы шамамен 300 мың АҚШ долларына тең.

Дерек бойынша қылмыстық іс қозғалып, тергеу жүріп жатыр.

Авторы: Мирас Қуандықов