13:10, 22 Наурыз 2022 | GMT +6
Өзбекстан үш жылға жарамды IT виза енгізуді жоспарлап отыр
ТАШКЕНТ. ҚазАқпарат – Өзбекстан 1 сәуірден бастап инвесторлар, IT компания құрылтайшылары, ақпараттық технология саласындағы мамандарға және олардың отбасына IT виза беруді жоспарлап отыр, деп хабарлайды ҚазАқпарат Өзбекстанның IT-паркіне сілтеме жасап.
IT виза Жеке тұлғаларға үш жылға дейін беріледі.
Аталған визаны алған азаматтар үш жыл бойы Өзбекстанға емін-еркін кіріп-шыға алады, сонымен қатар Өзбекстан азаматтарына қарастырылған білім және медицина қызметтерін алуға құқылы.
Одан бөлек, үй сатып алған жағдайда, олар Өзбекстанда тұруға ықтиярхат алады.
Виза IT-парктің ұсынысымен беріліп отырады. Оны алу шарттары мақсатына қарай ерекшеленеді.
IT-визаға берілген өтініш үш жұмыс күні ішінде қарастырылады. Отбасы мүшелеріне қонақ визасы беріледі.