Өзбекстан азаматтары алматылық зейнеткерлерді гипноздап, тонап келген
Қалалық ІІД баспасөз қызметінің хабарлауынша, Өзбекстан азаматтары өз елінде де осындай қылмыстары үшін істі болған.
«Бұлар зейнет жасындағыларды алдап келген. Қарт кісілерге ескі ақшаны жаңартып әкеп беремін деп алдаған. Сол кезде әккі қылмыскерлер қариялардың санасын гипноздап, ақшаларын қолды етіп отырған. Үлкен кісілер ақшаны өз қолдарымен қалай беріп қойғанын кейін әрең естеріне түсірді. Кей жағдайларда олар зейнеткерлерді банкке дейін ертіп апарған, ал олар есік алдында күтіп тұрған», - деді Бостандық аудандық ІІБ полиция бөлімінің басшысы Тимур Өсекбаев.
Оның айтуынша, қазір 5 өзбекстандық ұсталды. Сотқа дейінгі тергеу барысында олардың 3-еуінің дерекке қатысы бары анықталды. Қылмыскерлер қариялардың 3 млн теңгесін қолды еткен.
Полиция бұл адамдардың әрекетінен жапа шеккен азаматтар бар болса, 298-52-80; 298-52-83, 298-52-82 нөмірлеріне хабарласуды сұрайды.
