Отбасылық және гендерлік саясатта маңызды рөлді өңірлер атқарады – Ұлттық комиссия
Өңірлерде отбасылық және гендерлік саясатты іске асыру және Қазақстан Республикасындағы 2030 жылға дейінгі отбасылық және гендерлік саясат тұжырымдамасында бекітілген нысаналы индикаторларға қол жеткізу мәселелерін талқылау мақсатында мұндай кеңестерді Нұр-Сұлтан, Алматы, Шымкент қалаларының және облыстардың өңірлік комиссия мүшелерінің, үкіметтік емес ұйымдар өкілдерінің қатысуымен өткізу жоспарланып отыр.
Ләззат Рамазанова әйелдердің еңбегін қорғау, олардың мемлекеттік басқарудың барлық деңгейлерінде және корпоративтік салаларға қатысуын қамтамасыз ету мәселесіне Мемлекет басшысы Қ.Тоқаев үлкен көңіл бөлетіндігін баса айтты.
«Ел дамуындағы Атырау облысының орны қашанда айрықша. Өңірдің қазіргі заманға сай экономикалық, әлеуметтік әлеуетінің қалыптасуына атыраулық қыз-келіншектердің үлесінің нәтижесі», - деді Ұлттық комиссия төрағасы.
Кеңесте мемлекеттік гендерлік саясаттың жаңа кезеңі ұлттық стратегиялық басымдықтармен және әлеуметтік саясаттың жаңа қағидаттарымен байланыстылығына басымдық жасалды.
Ләззат Рамазанова қоғамның әр саласында еңбек етіп жүрген әйелдерді, оның ішінде праймеризге қатысатын қыз-келіншектерді жан-жақты қолдаудың маңыздылығын айтты. Сонымен қатар бұл жұмыстың үйлестірушісі ретінде өңірлік комиссиялардың белсенділігін арттыру керектігі аталды.
Соңында Атырау облысының әйелдер істері және отбасылық-демографиялық саясат жөніндегі өңірлік комиссиясына бірқатар нақты ұсыныстар берілді.