Отандық бизнес жемқорлықпен күресуге дайын ба - сауалнама
«Сауалнамаға қатысқандардың 25% сыбайлас жемқорлық мәселесі туындаған кезде уәкілетті органмен ынтымақтастыққа дайын еместігін білдірді»,-деді ҚР Сыбайлас жемқорлыққа қарсы іс-қимыл агенттігінің Нұр-Сұлтан бойынша департаменті превенция басқармасының басшысы Марат Хайруллин «Атамекен» кәсіпкерлер палатасының елодалық филиалында өткен кездесуде.
Ол мемлекеттік органдарға жүгінген кезде кәсіпкерлерді сыбайлас жемқорлыққа итермелейтін бірнеше себепті атады.
Ол дегеніміз - бюрократиялық рәсімдер, нормативтік-құқықтық актілердегі олқылықтар мен коллизиялар, лауазымды тұлғалардың қызмет бабын жосықсыз өнім берушілер үшін пайдалануы, тағы сол сияқтылар.
«Жоғарыда айтылғандардың бәрі тұрақты сыбайлас жемқорлық схемаларын қалыптастыруға ықпал етеді», - деді М.Хайруллин.
Оның мәліметінше, биыл жыл басынан бері департамент сыбайлас жемқорлыққа қарсы 7 мониторинг және жергілікті атқарушы органдар қызметінің сыбайлас жемқорлық тәуекелдеріне 2 сыртқы талдау жүргізді.
Атқарылған жұмыс аясында құрылыс, білім, тұрғын үй, кәсіпкерлік, денсаулық сақтау, көлік, салық және кеден салалары қамтылған. Нәтижесінде 86 ұсыным әзірленді.