16:47, 06 Қазан 2020 | GMT +6
Өскеменде жаңа аллея салынып жатыр
ӨСКЕМЕН. ҚазАқпарат – Өскемен қаласында жаңа демалыс орны пайда болмақ, деп хабарлайды ҚазАқпарат тілшісі.
Бұл жайлы қала басшысы Жақсылық Омар Instagram -дағы парақшасында жазды.
«19-шы шағын ауданда жаңа аллея салынуда. Демалыс орнының ұзындығы бір шақырымнан асады. Бүгінде аллеяның жартысы толықтай қолдануға берілді, ал қалған бөлігінде абаттандыру жалғасуда. Бұл жер тұрғындардың сүйікті орнына айналатындығы сөзсіз», - деді ол.
Қала әкімінің мәліметінше, аллея аумағында 350-ден астам көшет отырғызылған. Сондай-ақ орындықтар, қоқыс жәшіктері орнатылып, жарықтандыру жүргізілді.