Өскеменде зауыттағы 2 жұмысшының өліміне қатысты арнайы комиссия құрылады
ШҚО мемлекеттік еңбек инспекциясы басқармасының басшысы Бақытбек Қизатовтың айтуынша, қазіргі уақытта кәсіпорындағы қайғылы жағдайға қатысты жан-жақты тексеру жүргізіліп жатыр.
«5 қарашада сағат 17:20 шамасында «POSUK Titanium» ЖШС-ның екі жұмысшысы көз жұмды. Белгілі болғандай, олар электронды-сәулелік пеште профилактикалық жөндеу жұмыстарын жүргізіп жатқан. Сол жерге басқарма мамандары мен прокуратура қызметкерлері шұғыл келіп жетті. Қазіргі уақытта оқиғаның себебі мен мән-жайын анықтайтын арнайы комиссия құрылып жатыр», - деді ол.
Бақытбек Қизатов өз сөзінде осы жылдың 9 айында өңір кәсіпорындарында 153 жазатайым оқиға болып, 16 адам көз жұмғанын жеткізді.
Естеріңізге сала кетсек, осыған дейін Өскеменде кәсіпорында екі жұмысшы мерт болғаны хабарланған.