Өскеменде төрт баласына 2,5 млн теңге алимент төлемей жүрген борышкер табылды

ӨСКЕМЕН. ҚазАқпарат – Өскемен қаласының полицейлері балаларына 2,5 млн теңге алимент төлемей жүрген ер адамды тапты, деп хабарлайды ҚазАқпарат тілшісі.

ШҚО полиция департаменті баспасөз қызметінің мәліметіне сүйенсек, қалалық ПБ көші-қон қызметі бөліміне жеке сот орындаушысының қаулысы келіп түскен.

Онда жазылғандай, кәмелетке толмаған төрт баласына алимент төлеуден жалтарған 50 жастағы ер адамның жалпы қарызы 2 500 000 теңгеден асқан.

Тәртіп сақшылары бірден қашып жүрген борышкерді іздеуге кірісті.

«Жедел-іздестіру шаралары барысында көші-қон қызметінің мамандары алимент төлемей жүрген азаматтың орналасқан жерін анықтады. Өскеменнен табылған ер адам сол күні-ақ қарыз мөлшерін толықтай өтеді», - деді облыстық ПД бастығы Сағат Мадиев.

Айта кетейік, жыл басынан бері полиция қызметкерлері алимент төлемеген 350-ден астам адамды анықтаған.