Өскеменде полицейлер отырған көлік жол апатына себепкер болды
Алдын ала мәліметтер бойынша,«Toyota Carina» көлігінің жүргізушісі өзге көліктен басып озбақ болып, жол қауіпсіздігіне көз жеткізбей, қарсы бетте келе жатқан «Lexus»-пен және өзімен бір жолақта қозғалған «Nissan»-мен соқтығысқан.
Апат салдарынан үш азамат - «Lexus» жүргізушісі, сондай-ақ «Toyota» көлігінің жүргізушісі мен жолаушысы ауруханаға жеткізілді. «Toyota»-да болған 38 жастағы жолаушы (Өскемен полиция басқармасының қызметкері) алған жарақаттарынан оқиға орнында көз жұмды.
«Жол апаты фактісімен ҚР ҚК 345-бабының 3-бөлігімен қарастырылған құқықбұзушылық белгілері бойынша сотқа дейінгі тергеу амалдары басталды. Қылмыстық іс бойынша барлық тиісті тергеу амалдары жүргізілуде, сараптамалар тағайындалды», - деп нақтылады полициядан.
Айта кетейік, жол апаты кезінде «Toyota» көлігінде қалалық полиция басқармасының үш қызметкері - көліктің иесі және екі жолаушы отырғаны анықталды. Олардың барлығы қызметтен тыс уақытта болған.