Өскеменде қараусыз қалған үйден қару-жарақ арсеналы табылды
ШҚО Полиция департаменті баспасөз қызметінің мәліметіне сүйенсек, тәртіп сақшылары, Ұлттық қауіпсіздік комитетінің және Қылмыстық атқару жүйесінің өңірлік департаменттерімен бірлесіп заңсыз сақталған қару-жарақ арсеналын тапты.
Жедел-іздестіру шараларын жүргізу барысында атыс қарулары Өскемендегі иесіз қалған үйлердің бірінен табылған.
«Атап айтқанда, нөмірлері өшірілген 7,62 мм калибрлі наган маркалы ойық тапаншасы, оған 7,62 мм калибрлі 188 патрон, ТОЗ 34 ЕР аңшылық мылтығының оқпаны, Ф1 граната корпусы, аңшылық мылтықтың 20 калибрлі 12 патроны және 4 сигналдық зымыран анықталды. Қазіргі уақытта ҚР ҚК-нің 287-бабы 3-бөлігіне сәйкес сотқа дейінгі тергеу амалдары жүргізіліп жатыр», - делінген ақпаратта.
Баллистикалық сараптама нәтижелері бойынша тапанша жауынгерлік деп танылды, ал патрондар атуға жарамды.
