Өскеменде Гематология орталығы салынып жатыр
Аймақ басшысы Даниал Ахметов құрылыс жұмыстары барысын тексеріп қайтты. Гематология орталығы екі ғимараттан тұрады, атап айтқанда негізгі және пансионат.
«Негізгі корпус ғимараты 5 блокқа бөлінген. Мәселен, Б блогында жілік майын трансплантациялайтын балалар бөлімшесі, сондай-ақ балаларға арналған стационар және клиникалық-диагностикалық зертхана орналасады. Жілік майын трансплантациялайтын ересектерге арналған бөлім В блогында болады. Сол жерде ересектер стационары, диагностикалық және амбулаториялық бөлімше ашылады», - деді облыс әкімі.
Сәулелік диагностика мен термотерапия бөлімшелері, трансфузиология орталығы, полимеразды және тізбекті реакция зертханасы, операциялық бөлім және цитостатиктерді орталықтандырылған өсіру Г блогында орын теппек. Ал патоморфологиялық және цитологиялық бөлімдер, FISH және генетикалық зертхана, лимфомасоматика және хирургия стационары Д блогында орналасады.
Сонымен қатар жобада ойын бөлмесі, психолог кабинеті, оқу сыныптары, конференция залы және дәмхана қарастырылған. Тәулік бойғы стационарда 146 төсек-орыннан, күндізгі стационарға 30 және гемодиализ үшін 4 төсек-орын болады. Көпбейінді консультативтік-диагностикалық бөлімшеде бір ауысымда 150 келушіге қызмет көрсетіледі. Дәрігерлер мен қызметкерлер шет мемлекеттердің үздік орталықтарында оқудан өтеді.
«Биыл барлық 5 блок бой көтереді. Негізгі құрылыс-монтаждау жұмыстары аяқталмақ. Мұнда көрсетілетін жоғары технологиялық медициналық қызметтерді пайдалана отырып, ең үздік халықаралық тәжірибе енгізілетін болады. Бұдан бөлек, облыстың денсаулық сақтау саласын жоғары деңгейге көтерудегі өте маңызды элемент – ғылыми-зерттеу базасын дамытуды көздеп отырмыз. Жалпы, Гематология орталығы еліміздің жетекші медициналық ұйымдарының бірі болмақ», - деді Даниал Ахметов.