19:10, 04 Желтоқсан 2022 | GMT +6
Өскеменде екіқабатты дәмхана өртенді
ӨСКЕМЕН. ҚазАқпарат – Өскемен қаласында екіқабатты дәмханадан өрт шықты, деп хабарлайды ҚазАқпарат тілшісі.
ШҚО Төтенше жағдайлар департаменті баспасөз қызметінің мәліметіне сүйенсек, бүгін сағат 14:05-те Өскемен қаласындағы Чехов көшесінде орналасқан екіқабатты дәмханадан өрт шықты. Бес минуттың ішінде оқиға орнына 6 техника мен 25 құтқарушы жұмылдырылған.
«Бірінші және екінші қабаттардың арасындағы ағаш төбе жанып жатты. Зардап шеккен ешкім жоқ. Өрт сөндірушілер тілсіз жауды сағат 18:24-те толықтай ауыздықтады. От шыққан кезде дәмхана ішінде тамақтанушылар болмаған», - деп хабарлады ведомство өкілдері.
Қызыл жалынның жалпы ауданы – 70 шаршы метр. Өрттің нақты неден шыққаны әлі анықталып жатыр.