06:30, 08 Қазан 2021 | GMT +6
Өскеменде екі жаңа емхана бой көтереді
ӨСКЕМЕН. ҚазАқпарат – Өскемен қаласында екі жаңа емхана ашылмақ, деп хабарлайды ҚазАқпарат тілшісі.
ШҚО Денсаулық сақтау басқармасы баспасөз қызметінің мәліметіне сүйенсек, Өскеменде екі жаңа медициналық мекеме бой көтереді. Бұндағы мақсат – халыққа медициналық қызметтердің қолжетімділігін арттыру.
«Жаңа емханалардың бірі Протозанов көшесінде орналасады. Қазіргі уақытта сол жақта бос тұрған ғимаратты жөндеу жұмыстары басталып кеткен. Бұл жерде 3 жыл бұрын сүт өнімдерін жасайтын мекеме болды. Енді оның орнына емхана ашылады. Осылайша, бұл көшеде тұратын халық алысқа сабылмай сонда барып, дәрігерлерге қаралуына жағдай жасалады», - дейді басқарма басшысы Ермек Омарбеков.
Ал екінші емхана Ертістің сол жағалауындағы бұрынғы тері-венерологиялық диспансерінің орнына ашылады. Ескі ғимаратқа күрделі жөндеу жұмыстарын жүргізу жоспарланып отыр.