Өскеменде екі ер адам өртенген жер үйде қалып қойған 74 жастағы әжені құтқарды

2022 жылғы 30 қараша, 14:41
Өскеменде екі ер адам өртенген жер үйде қалып қойған 74 жастағы әжені құтқарды

ӨСКЕМЕН. ҚазАқпарат – Өскемен қаласында екі ер адам өртенген жер үйден 74 жастағы әжені құтқарып қалды, деп хабарлайды ҚазАқпарат тілшісі.

ШҚО төтенше жағдайлар департаменті баспасөз қызметінің мәліметіне сүйенсек, Өскемендегі Бажов көшесінде орналасқан жер үйде өрт шыққан.

Үй төбесінің ағаш құрылымдары, шатыры, жиһаз, тұрмыстық техника мен жеке заттар жанған.

«Өрт сөндірушілер келгенге дейін үйдің қасынан өтіп бара жатқан ер адам түтінді байқап қалады. Ол үйдің көршісін оятып, екеуі терезені сындырып, ішке кірген. Бөлмелерді аралап шыққанда қаннен-қаперсіз ұйықтап жатқан 74 жастағы әжені көріп, оны сыртқа алып шығады. Осылайша, олар зейнеткердің өмірін сақтап қалды», - делінген ақпаратта.

Көп ұзамай жеткен құтқарушылар жалпы ауданы 80 шаршы метрді құраған тілсіз жауды толықтай ауыздықтады.

Жеке құрамнан барлығы 8 адам мен 2 техника жұмылдырылған.



Серіктестер жаңалықтары

Jańalyqtar