Өскеменде ауруханада өрт шығуына себепкер ретінде сантехниктер ұсталды

СЕМЕЙ. ҚазАқпарат – Өскемендегі №4 қалалық ауруханада өрт шығуына медициналық мекеменің сантехниктері себепкер болуы мүмкін, деп хабарлайды ҚазАқпарат тілшісі.

6 қазан күні түнгі сағат 01.00 шамасында Өскемендегі Серікбаев көшесінде орналасқан №4 қалалық аурухананың жертөлесінен өрт шыққан. Оқиға орнына өрт сөндірушілер шұғыл келіп жеткен. Сондай-ақ медициналық мекемеге ШҚО әкімінің орынбасары Шәкәрім Бұқтұғытов пен қала әкімі Жақсылық Омар келді.

«Дереу ауруханадағы пациенттерді эвакуациялау басталды. Барлығы 59 науқас пен 12 медицина қызметкері қауіпсіз жерге көшірілген. Зардап шеккен ешкім жоқ. Сағат 02.30-да 12 шаршы метр аумақта жиһаздар мен заттарды шарпыған тілсіз жау толықтай ауыздықталды. Науқастарға қосымша медициналық көмек қажет болмады», - деп хабарлады облыстық Ақпарат орталығы.

Алдын ала мәлімет бойынша, өрттің шығуына медициналық мекемеде жұмыс істейтін, ішімдік ішіп алған сантехниктер себепкер болған. Қазіргі уақытта олар уақытша ұстау изоляторына қамауға алынды.