Өрт: 80 адам қауіпсіз жерге шығарылды

ТАЛДЫҚОРҒАН. ҚазАқпарат - Алматы облысында 5 қабатты тұрғын үйден өрт шықты. Бұл туралы ҚР ІІМ Төтенше жағдайлар комитетінің ресми өкілі Нұрсұлтан Нұрахметов айтты деп хабарлайды ҚазАқпарат тілшісі.

Оның айтуынша, бүгін өртке қарсы қызметтің пультіне Алматы облысының Жамбыл ауданынан қарасты Қарғалы ауылындағы 5 қабатты тұрғын үйден өрт шыққандығы туралы хабарлама түскен.

«Өрт 2 қабаттағы пәтерлердің бірінен шығып, 9 шаршы метр аумақты шарпыған. Оқиға орнынан жеткен өрт сөндіру бөлімшесінің мамандары 80 адамды, оның ішінде 6 баланы қауіпсіз жерге шығарды. Сағат 09-03-те өрттің алды алынып, 09-06-да сөндірілді. Қаза тапқандар мен зардап шеккендер жоқ. Өрт шығуының алдын ала себебі - электр сымдарының қысқа тұйықталуы», - деді ол.

Ресми өкіл дерегінше, тылсыз жаумен күреске Алматы облыстық төтенше жағдайлар департаменті жеке құрамының 6 маманы мен 2 техникасы жұмылдырылған.