Оралдық тұрғын алған қарызы 22 млн теңгеге жеткенше қайтармаған

ОРАЛ. ҚазАқпарат – Оралдық тұрғын алған қарызы 22 млн теңгеге жеткенше қайтармаған, деп хабарлайды ҚазАқпарат тілшісі.

БҚО полиция департаментінің баспасөз қызметі мәлім еткеніндей, 33 жастағы ер адамнан танысы 2018 жылы сеніміне кіріп, пайызбен қарызға ақша алған.

Қарызы өсе келе 22 млн теңгеге жеткен. Осыдан кейін жәбірленуші полицияға шағым түсірген.

Қабылданған шаралар нәтижесінде 32 жастағы ер адам қолға түсіп, уақытша ұстау изоляторына қамалды. Оның басқа да қылмыстарға қатысы бар-жоғы тексерілуде.

Қазіргі кезде алаяқтық дерегі бойынша ҚР ҚК 190-бабы 4-бөлігіне сәйкес сотқа дейінгі тергеу амалдары жүргізілуде.

Еске сала кетейік, бұдан бұрын Оралда әйелдің қарызға берген 14 млн теңгесін ала алмай жүргенін, БҚО-да жарты тоннаға жуық балық тиелген көлік ұсталғанын жазған болатынбыз.