Оралда жеңіл көлік локомотивпен соқтығысып, екі жігіт көз жұмды

АСТАНА. ҚазАқпарат - Оралда жеңіл автокөлік локомотивпен соқтығысып, екі жігіт көз жұмды, деп хабарлайды ҚазАқпарат тілшісі.

Оқиға бүгін түнде "Променад" сауда үйі маңында орын алды. "ВАЗ-2114" автокөлігі бірнеше жүк вагонымен кетіп бара жатқан локомотивпен соқтығысқан.

Облыстық денсаулық сақтау басқармасының баспасөз хатшысы Айнагүл Сақпосынованың айтуынша, жедел жәрдемге хабар оқиға болған Сырым Датұлы мен И.Ларин көшелерінің қиылысынан сағат 03.30-да түскен. Жедел жәрдем көлігі алты минуттан кейін жеткенімен, 26 жастағы жігіт оқиға орнында мерт болды. Ашық бас-ми жарақатын алған 25 жасар жігіт қалалық көпбейінді ауруханаға барар жолда жан тапсырған.

Қазіргі кезде оқиғаның мән-жайы анықталып жатыр.