Оралда жасанды су қоймасында екі бала құтқарылды

ОРАЛ. ҚазАқпарат - Оралда жасанды су қоймасында екі бала құтқарылды, деп хабарлайды ҚазАқпарат тілшісі.

БҚО ТЖ департаментінің баспасөз қызметінен түскен мәліметке қарағанда, оқиға бүгін қалаға қарасты Желаев кентіндегі жасанды су қоймасында орын алған.

Екі баланың су қоймасындағы аралға өз бетімен жүзіп барып, кері қайта алмай жатқаны жөнінде мәлімет сағат 16.12-де келіп түскен.

Сол бойда оқиға орнына құтқарушылар (4 адам, 1 техника және жүзу құралы) жетті. Сағат 17.00-де 2005 және 2006 жылғы балалар аман-есен жағаға жеткізілді.

Оралда соңғы күндері күн қатты ысып, бүгін температура тілі 34-35 градусқа дейін көтерілді. Соның әсерінен биыл суға түсу де ерте басталып кетті.