Оралда Ұлттық ұлан сарбаздары екі адамды есірткімен және суық қарумен ұстады
ҚР Ұлттық ұланы «Батыс» өңірлік қолбасшылығының баспасөз қызметінен түскен мәліметке қарағанда, 12 мамыр күні 34 жастағы ер адам есірткімен қолға түскен.
Сағат 22.30 шамасында 5517-әскери бөлімінде қызмет ететін, құрамында сержант Ержан Ерболат пен қатардағы жауынгер Асхат Қажымұратов бар топ Орда көшесінде жүрген күдікті адамға назар аударған.
Тоқтатып, куәгерлердің қатысуымен қараған кезде күртесінің қалтасынан қағаз орамаға салынған зат табылды. Ол марихуана болып шықты.
Сол күні қатардағы жауынгерлер Тимур Кәрім мен Андрей Ростовщиков өзін дөрекі ұстаған ер адамның шалбарының қалтасынан зауытта жасалған жиналмалы пышақ тапқан.
Қолға түскен күдіктілер полиция қызметкерлеріне тапсырылды.
Қырағылық көрсеткені үшін аталған жауынгерлер бөлім командирімен ынталандырылды.
Жыл басынан бері 5517-әскери бөлім жауынгерлері суық қарумен жүрген бірнеше адамды ұстап үлгерді.