Оралда сайлау күні автобустар тегін жүреді

ОРАЛ. ҚазАқпарат – Орал қаласында сайлау күні автобустар тегін жүреді, деп хабарлайды ҚазАқпарат тілшісі.

Орал қаласы әкімдігінің баспасөз қызметі мәлім еткеніндей, 10 қаңтар күні қаладағы барлық бағыттар бойынша қоғамдық көліктерде жол жүру тегін болады.

Қала әкімдігі қоғамдық көліктерде маскалық режимді сақтау керектігін еске салды.

Сондай-ақ Қаратөбе ауданы орталығы Қаратөбе ауылында ауа райының қолайсыздығына байланысты ертең екі бағытта тегін автобус маршруты ұйымдастырылады.

Ауыл әкімі Абат Зейнуллиннің сөзіне қарағанда, өз учаскелері бойынша хабарласқан қарт адамдарға еріктілер арқылы автокөлік жіберіледі.

Еске сала кетейік, елордада 10 қаңтарда автобустар жолаушыларды тегін тасымалдайды.