08:20, 18 Шілде 2022 | GMT +6
Оралда көлік апатынан сегіз адам мерт болды
ОРАЛ. ҚазАқпарат - Жол-көлік оқиғасы 18 шілде күні сағат 02:45-те Орал қаласындағы айналма тас жолда, «ВенОйл» жанармай құю бекетіне қарама-қарсы жерде болды, деп хабарлайды ҚазАқпарат «Мой город» порталына сілтеме жасап.
Орал қалалық ІІБ жергілікті полиция қызметінің бөлім бастығының орынбасары Константин Недопекиннің оқиға орнында хабарлауынша, Nissan (көлікте тек жүргізуші болған) және Lada (салонда бес ересек адам және екі бала болған) көліктері соқтығысқан.
«Басып озу кезінде Nissan жүргізушісі қарсы жолаққа шығып кетіп, Lada көлігімен соқтығысқан. Оқиға салдарынан бес адам оқиға орнында көз жұмды, тағы үшеуі ауруханаға жатқызылды», - деді капитан Недопекин.
Кейін есін жимай, Nissan жүргізушісі мен 10 және 13 жастағы екі бала ауруханада қайтыс болғаны белгілі болды. Оқиға орнында полиция қызметкерлері жол-көлік оқиғасының себептері мен мән-жайын анықтап, жұмысын жалғастыруда.
