12:17, 18 Қыркүйек 2020 | GMT +6
Оралда із-түзсіз жоғалып кеткен 54 жастағы ер адам 8 күннен бері табылмай жатыр
ОРАЛ. ҚазАқпарат – Оралда із-түзсіз жоғалып кеткен 54 жастағы ер адам 8 күннен бері табылмай жатыр, деп хабарлайды ҚазАқпарат тілшісі.
БҚО полиция департаментінің баспасөз қызметі мәлім еткеніндей, Мадияр Бисенғалиев 10 қыркүйек күні сағат 13.00-де «Тойота Авенсис» автокөлігімен үйінен шығып кеткеннен оралмаған.
«Құс фабрикасы» ауданында Атамекен көшесі 93-үйде тұратын М.Бисенғалиевтің бойы 170-175 сантиметр, басына қоңыр кепкі, үстіне шолақ жең ақ көйлек, ақшыл түсті джинсы, аяғына қара туфли киген. Өзімен бірге автокөлік құжаттары салынған қара барсеткасы, «Самсунг» телефоны (нөмірлері: 8-701-839-40-01, 8-777-659-06-82) болған.
Ерекше белгілері жоқ.
Бұл оқиға бойынша Орал қаласы полиция басқармасы тергеу амалдарын жүргізуде.
Еске сала кетейік, бұдан бұрын Оралда 16 жасар қыздың төртінші қабаттан секіріп, аман қалғанын жазған болатынбыз.