07:47, 05 Ақпан 2019 | GMT +6
Оралда есірткі сатумен айналысқан күдікті ұсталды
ОРАЛ. ҚазАқпарат - Орал қаласында есірткі сатумен айналысқан күдікті ұсталды, деп хабарлайды ҚазАқпарат тілшісі.
БҚО полиция департаментінің баспасөз қызметінен түскен мәліметке қарағанда, оқиға 1 ақпан күні шамамен сағат 18.30-да орын алды.
Жедел іздестіру шаралары барысында департаменттің есірткі бизнесімен күрес басқармасының қызметкерлері Ж. деген тұрғынды қолға түсірді.
Одан 60 грамнан астам марихуана тәркіленді.
Күдіктіні ұстауға оның іс-әрекетін шектеу және қоғамдық тәртіпті қамтамасыз ету мақсатында арнайы мақсаттағы бөлініс жауынгерлері де қатысты.
Қазіргі кезде ҚР ҚК 297-бабы 2-бөлігіне ( ірі мөлшерде есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу) сәйкес тергеу амалдары жүргізілуде.