Оралда Бөкей ордасы мектептері мұражайларының көрмесі ашылды

ОРАЛ. 23 қазан. ҚазАқпарат - Бүгін Батыс Қазақстан облыстық тарихи-өлкетану мұражайында «Әр мектепте мұражай» шарасы аясында Бөкей ордасы ауданындағы Жәңгір хан және Мәншүк Мәметова атындағы мектептер мұражайларының көрмесі ашылды.

Көрменің ашылу салтанатында Бөкей ордасынан шыққан өңірге танымал еңбек ардагерлері Кәкен Көбейсінов, Гүлжу Мәжитова ізгі тілегін білдіріп, өлкенің тарихын қаттап, кейінгі ұрпаққа жеткізетін мұражай ісінің мәні зор екендігін айтты. Облыстық тарихи-өлкетану мұражайының директоры Әбіл Жоламановтың атап өткеніндей, Қазақ елінде мұражай ісі Жәңгір ханнан бастау алған. Оның өз сарайында ұйымдастырған қару-жарақ палатасы бүгінде Бөкей ордасы мұражайлық кешеніне айналып отыр.

Аталмыш көрмеге Бөкей ордасының өткенінен хабар беретін көне жәдігерлер қойылған.