Оралда бір күнде 50 адамнан коронавирус табылды
БҚО санитарлық-эпидемиологиялық бақылау департаментінің баспасөз қызметі мәлім еткеніндей, соңғы тәулікте 84 адамның індет жұқтырғаны белгілі болса, соның 50-і Орал қаласының үлесіне тиеді.
Соңғы үш күнде өңірде 205 адамның ауырғаны тіркелсе, соның 118-і, яғни тең жартысынан астамы облыс орталығында анықталған.
Сондай-ақ үш күнде Шыңғырлау ауданында 20, Бәйтеректе 14, Ақжайықта 12, Теректіде 11, Бөрліде 10 адамнан коронавирус табылды.
Індет басталғаннан бері облыста 12329 адам дертке шалдығып, соның 9897-сі жазылып шықты. 199 адам көз жұмды.
Эпидемиологтардың сөзіне қарағанда, індетті қоғамдық орындар мен базарларда, адамдар көп жиналатын орталықтарда, жұмыс барысында, автобуста жұқтыру деректері тіркелуде. Сонымен қатар түрлі отбасылық іс-шаралардың тыйылмауы да алаңдатады.
Еске сала кетейік, бұдан бұрын Батыс Қазақстанда 35 мұғалімнен коронавирус анықталғанын жазған болатынбыз.