Оңтүстік Шығыс Азияда құлдықта болған Қазақстанның 14 азаматы босатылды

АСТАНА. ҚазАқпарат – Былтырғы маусым айынан бері Оңтүстік Шығыс Азия елдерінде құлдықта болған 14 Қазақстан азаматына көмек көрсетілді. Бұл туралы елордада өткен баспасөз мәслихатында Сыртқы істер министрлігінің ресми өкілі Айбек Смадияров мәлім етті, деп хабарлайды ҚазАқпарат тілшісі.

«Былтырғы маусым айынан қазіргі уақытқа дейін Таиландтағы елшілігіміз Қазақстанның 14 азаматына көмек көрсетті. Оларды мәжбүрлі түрде жұмысқа салынған. Сонымен қатар бұл адамдар Мьянма мен Лаоста болғаны анықталды», - деді А. Смадияров.

Осы орайда ол шетелге барғысы келетін еліміздің азаматтары көбіне алданып қалатынын айтты.

«Көбінесе біздің азаматтар шетелге жоғары жалақыға қызығып жұмысқа барады. 2-3 мың АҚШ долларына дейін айлық төлейміз деп компаниялар шақырған кезде, адамдар шарттың мазмұнына мән бермей жатады. Соның салдарынан кейін қиын жағдайға тап болады. Шетелге барар алдында бүкіл құжатты мұқият қарап шығуға кеңес береміз», - деді ресми өкіл.

Бұдан бұрын хабарланғандай, – Мьянмада құлдықтан босап шыққан Қазақстаның екі азаматы елге жеткізілді.

Фото: api.theins.info