Оңтүстік Кореяда мамырда инфляция өсімі 5 пайыздан асуы мүмкін
2022 жылғы 26 мамыр 15:05

Оңтүстік Кореяда мамырда инфляция өсімі 5 пайыздан асуы мүмкін

НҰР-СҰЛТАН. ҚазАқпарат - Оңтүстік Корея инфляциялық қысымды тежеу және халықтың өмір сүру деңгейін тұрақтандыруға бағытталған бірқатар шаралар жариялауды жоспарлап отыр, деп хабарлайды ҚазАқпарат Yonhap News Agency ақпарат агенттігіне сілтеме жасап.

Қаржы министрінің бірінші орынбасары Банг Ги Сунның айтуынша, елде азық-түлік пен басқа да тауарлар бағасын шұғыл тұрақтандыру қажеттігі туындап отыр.

Шенеунік атап өткендей, сарапшылардың пікірінше, тұтынушылық инфляция мамырда 5%-дан асып, өткен айлардағы өсу қарқынымен салыстырғанда (сәуірде – 4,8%, наурызда – 4,1%) жылдамдап, 2008 жылғы қыркүйекте белгіленген деңгейге жетуі мүмкін.

Халықаралық валюта қоры Оңтүстік Кореядағы инфляция 2022 жылы 4 пайызға артып, елдің орталық банкінің 2 пайыздық мақсатты көрсеткішін екі есеге арттырады деп болжайды.


Ұқсас жаңалықтар
Норвегиядағы инфляция соңғы 34 жылдағы ең жоғары деңгейге жетті
2022 жылғы 10 тамыз 17:42

Норвегиядағы инфляция соңғы 34 жылдағы ең жоғары деңгейге жетті

НҰР-СҰЛТАН. ҚазАқпарат – Норвегияда соңғы 12 айда тауарлар мен қызмет көрсету бағасы орта есеппен 6,8 пайызға өсті. Бұл жөнінде сәрсенбі күні Корольдіктің Орталық статистикалық басқармасы мәлім етті, деп хабарлайды ҚазАқпарат ТАСС ақпарат агенттігіне сілтеме жасап.

Бұл – 1988 жылдан бері тіркелген ең жоғары көрсеткіш.

Ведомствоның өкілі Эспен Кристиансен инфляцияның негізгі қозғаушы күші азық-түлік пен алкогольсіз сусындар бағасының «тарихи» өсуі екенін айтты.

Маусымнан шілдеге дейін бұл тауарлар 7,6%-ға қымбаттаған. Бұл 2021 жылдың сәйкес кезеңімен салыстырғанда 3,45 есе жоғары.

«Біз бұрын-соңды бір ай ішінде азық-түлік бағасының осыншама көтерілуін бастан өткерген емеспіз», - деп атап өтті Кристиансен.





Фото: 24.kz



Бюджет шығыны мен мұнайдан тыс кіріс арасында алшақтық бар – ҰБ есебі
2022 жылғы 7 тамыз 12:55

Бюджет шығыны мен мұнайдан тыс кіріс арасында алшақтық бар – ҰБ есебі

НҰР-СҰЛТАН. ҚазАқпарат – Қазақстан Ұлттық банкі қаржылық тұрақтылықтың негізгі тәуекелдері мен факторларын кешенді талдау және бағалау нәтижелері тұрғысында 2021 жылғы қаржылық тұрақтылық туралы есебін жариялады, деп хабарлайды ҚазАқпарат тілшісі.

Ұсынылған есепке қарағанда, 2021 жылы карантиндік шектеулерді жеңілдету – іскерлік белсенділіктің өсуіне ықпал етіп, оның экономикалық өсу перспективаларына да оң әсері болды. Дегенмен, өнімді жеткізу тізбегінің толық қалпына келмеуі және энергия жеткізушілер бағасының жоғары болуы инфляциялық қысымның күшеюіне алып келді. Соның әсерінен экономикасы дамыған елдерде ақша-кредит саясатының күшеюі, мемлекеттік қарыз деңгейінің өсуі және бюджет тапшылығы жаһандық сын-қатерлерге айналды.

«Фискалдық саясат үшін негізгі тәуекел факторы мемлекеттік қаржының теңгерімсіздігі болып қала береді. Бұл бюджет шығыстары мен мұнайдан тыс кірістер арасында сақталып отырған тым жоғары алшақтықтан көрініп отыр. 2014 жылдың аяғында мұнай бағасының төмендеуі мұнай секторынан түсетін қосымша үстеме табыстың жинақталуына тұсау салды. Бұл, өз кезегінде, ұзақ уақыттан бері Үкімет қолындағы таза активтердің төмендеуіне алып келді. 2021 жылдың соңына қарай таза активтер ЖІӨ-ге қатысты ең төменгі мәндеріне жетті», - делінген Ұлттық банк мәліметінде.

Бұл тұрғыда есепте мемлекеттік қаржының теңгерімділігі мен орнықтылығын арттыру мақсатында Бюджет кодексіне енгізілген фискалдық ережелерді сақтау маңызды екені айтылған. Олар Ұлттық қор активтерінің сақталуын қамтамасыз етеді және бюджет шығыстарының шамадан тыс өсуін тежейді.

Сонымен бірге 2021 жылы қаржы ұйымдарының несиелік қызметі COVID-19-дан кейін экономикалық өсудің қалпына келуі аясында қарқын ала түсті. Банктердегі несие портфелінің өсімі 27,9 пайызға, яғни жеке тұлғаларға (40,9%) және ШОБ субъектілеріне (29,2%) жаңа несие беру есебінен қамтамасыз етілді. Банктердегі несие портфелінің сапасы корпоративтік әрі бөлшек портфельде айтарлықтай жақсарды.

«2021 жылы депозиттердің долларлану деңгейі 2020 жылғы деңгеймен салыстырғанда 39-дан 37 пайызға төмендеді. Бұл процесс биыл да жалғасты (мамырда – 33%)», - деп аталып өткен ҰБ хабарламасында.

Ұлттық банк сайтында аталған есеп мәліметтерімен толық танысуға болады. https://nationalbank.kz/kz/news/otchet-o-finansovoy-stabilnosti/rubrics/1815


Қазақстаннан Ресейге қалай ақша аударуға болады
2022 жылғы 5 тамыз 13:20

Қазақстаннан Ресейге қалай ақша аударуға болады

НҰР-СҰЛТАН. ҚазАқпарат – Биыл ресейлік бірқатар банк санкцияға тап болып, SWIFT халықаралық аударым жүйесінен ажыратылған болатын. Сонымен қатар Ресей аумағында Visa мен Mastercard халықаралық төлем жүйесі де істемейді. Қазақстанда жұмыс істейтін ресейлік еншілес банктер де аталған жүйеден ажыратылаған. Дәл осы жайт көрші елмен тығыс байланысы бар қазақстандықтардың да тіршілігіне әсерін тигізіп отыр, деп хабарлайды ҚазАқпарат тілшісі.

Қазақстанның Ресейдегі Елшілігі ұсынған дерекке сәйкес, көрші елдің жоғары оқу орындарында жне ондағы шетелдік ЖОО-лардың филиалдарында 60 мыңнан астам қазақстандық студент бакалавриатура, магистратура бағдарламалары бойынша білім алып жатыр.

Еліміздегі ірі сауда желілерінің біріндегі тауар түрінің шамамен 10 пайызы Ресейден жеткізіледі. Өзге елдерден келетін импорт түрінің шамамен 40 пайызын да көрші ел арқылы алып отырмыз.

Қазіргі уақытта Visa мен Mastercard төлем жүйесі Ресей ішінде ғана жұмыс істейді. Аталған төлем жүйесінің қазақстандық банк карталары Ресейде жарамсыз.

Қазақстан Елшілігі ақша аудару үшін ресейлік «Мир» ұлттық төлем жүйесін қолдануға кеңес береді. Қазіргі уақытта «Мир» картасымен Қазақстанның төрт банкі, атап айтқанда Halyk Bank, ЦентрКредит банкі, Сбербанк Қазақстан, ВТБ Қазақстан ғана жұмыс істейді.

Қазақстаннан Ресейге ақша аударымын жасау үшін MIR/Unionpay төлем жүйесі бар банктің дебет картасын рәсімдеу қажет. Содан соң банк реквизеттерн Қазақстандағы ата-анасына/туыстарына беру керек. Олар реквизит арқылы ақша қаражатын аудара алады. MIR/Unionpay төлем жүйесі бар дебет картасын санкциялық тізімге енбеген банктердің бөлімшелерінен рәсімдеуге болады.

Қазақстан Ұлттық банкі мәліметінше, қазіргі уақытта клиенттерге Ресейге банктердің (оның ішінде ресейлік еншілес банктер арқылы да) ішкі желілерімен банктік аударым жасау, банктік есепшот ашпай-ақ халықаралық ақша аудару жүйесінің қызметтері, Visa мен Mastercard-тан басқа өзге төлем жүйелерінің төлем карталары арқылы ақша жіберу қызметі ұсынылады.

«Қазақстан мен Ресейдің шаруашылық субъектілері арасындағы үздіксіз есеп айырысуды қамтамасыз ету мақсатында санкциялық шектеулерге енбеген субъектілермен іскерлік қатынас ортау мүмкіндігін қарастырған жөн деп санаймыз», - деп атап өтеді Ұлттық банк.


Jańalyqtar

Үрдіс

MURAǴAT