Оңтүстік Корея баллистикалық зымыран ұшырған Солтүстік Кореяны айыптады
«Бүгін таңертең Солтүстік Корея БҰҰ қауіпсіздік кеңесінің қарарларын айқын бұзып, сондай-ақ Корей түбегінің және бүкіл әлемнің бейбітшілігі мен тұрақтылығына қауіп төндіретін елеулі арандатушылық саналатын «спутник ұшыру» деген сылтаумен ұзақ қашықтыққа баллистикалық зымыран ұшырды. Біз аталған елдің бұл ісін айыптаймыз. Солтүстік Корея келіссөз үстеліне оралады деген үмітіміз бар», - деді Пак Жин елімізге сапары барысында ұйымдастырылған баспасөз мәслихатында.
Бұған дейін бірқатар БАҚ Солтүстік Корея өзінің алғашқы ғарыштық спутнигін орбитаға шығару үшін баллистикалық зымыран ұшырғанын хабарлаған еді.
Зымыран ұшқаннан кейін көп ұзамай теңізге құлады. Оңтүстік Корея әскерилері зымыранның радар экрандарынан тез жоғалып, құлағанын растады.
Кейін зымыран қалдықтары Корей түбегінің батысындағы Сары теңізге түскен. Талдауға сәйкес, зымыран расымен де ғарыштық спутникті ұшыруға арналған.
Еске салсақ, бұған дейін Оңтүстік Корея сыртқы істер министрінің Қазақстанға ресми сапармен келетінін хабарлаған едік.
Ақорда мәліметінше, бүгін Мемлекет басшысы Қасым-Жомарт Тоқаевтың Оңтүстік Корея Республикасының сыртқы істер министрі Пак Жинмен кездесуі жоспарланған.