Он жасынан домбыраны жанына серік еткен Юрий Кочетыгов
2022 жылғы 3 шілде 16:45

Он жасынан домбыраны жанына серік еткен Юрий Кочетыгов

КӨКШЕТАУ. ҚазАқпарат - Көкшетаулық жас домбырашы Юрий Кочетыгов домбырамын қазақ күйлерін аса шеберлікпен орындайды, деп хабарлайды ҚазАқпарат тілшісі.

Юрий отбасының тұңғышы. Көкшетаудағы Біржан сал атындағы музыка колледжінде домбырашы мамандығы бойынша білім алады. Домбыра үйірмесіне он жасынан анасы қолынан жетектеп апарған. Алғаш рет домбыраның шанағынан төгілген сиқырлы үнді естіген оның бірден осы музыкалық аспапқа әуестігі басталады.


«Көкшетаудағы Біржан сал атындағы музыка колледжінде «Домбыра пәнінің мұғалімі» мамандығы бойынша білім аламын. Домбыра үйірмесіне он жасымда анам апарды. Содан бері домбыраны қолымнан тастаған емеспін. Алғашқы ұстазым Серік Сәрсенбаев болды. Сол кісіден 5 жыл бойы домбыра шертудің қыр-сырын үйрендім. Кейін менің қабілетім барын білген ол оқуға түсуге кеңес берді. Осылайша, бүгінгі күні музыка колледжінде білімді жалғастырып келемін», - дейді Юрий Кочетыгов.

Өнерлі өрен мемлекеттік тілде де мүдірмей сөйлейді. Артынан ерген қарындасы Злата да қазақ мектебінде оқиды. Ол да өнерден құр алақан емес. Ағасы сияқты домбыра, флейта аспаптарында ойнайды. Ал, ата-аналары әрдайым олардың өнеріне қолдау білдіріп, шығармашылықтарын шыңдауға үлес қосып келеді.

«Кішкентайымнан қазақ тілін меңгеріп алдым. Қазақ тілді балабақша мен мектепте оқығандықтан, сондай-ақ, айналамдағы орта әсер еткендіктен, маған қазақша үйрену қатты қиындық туғызған жоқ», - деп қосты Юрий Кочетыгов.

Осы күні Юрийдің репертуарында халқымыздың атақты күйшілерінің 50-ден астам күйі бар. Осының арқасында, ол көптеген халықаралық, республикалық және облыстық байқаулардың жүлдегері атанып жүр.


Ұқсас жаңалықтар
Ұлттық домбыра орталығы құрыла ма
2022 жылғы 1 тамыз 13:48

Ұлттық домбыра орталығы құрыла ма

НҰР-СҰЛТАН. ҚазАқпарат – Ұлттық домбыра орталығын құру мәселесі қосымша пысықтауды талап етеді. Бұл туралы Мәжіліс депутаттарының сауалына ҚР Премьер-Министрінің орынбасары Ералы Тоғжановтың жауабында айтылған, деп хабарлайды ҚазАқпарат тілшісі.

«Қазақ өнерін дамыту мақсатында еліміздің түпкір-түпкірінде көптеген ұлттық аспаптар ұжымдары қызмет етіп, әртүрлі байқаулар мен фестивальдар тұрақты өткізіліп жатыр. Халық аспаптарының оркестрлері Қазақстанның әр аумағында жұмыс жасайды. Мұндай ұжымдардың қызметі қазақ салт-дәстүрлерінің ұмытылмауының кепілі», - деді Үкімет басшысының орынбасары жауабында.

Вице-премьердің атап өтуінше, елордада Мемлекеттік академиялық филармониясында қазақ оркестрі, «Сарыарқа» фольклорлық ансамблі, «Қорқыт» этно-ансамбльдері, Алматы облысында Сүйінбай атындағы облыстық филармониясында домбырашылар ұжымы мен «Алатау әуендері» концерттік бірлестігі, Ақтөбе облысында «Ер Едіге» жыр мектебі, Павлодар облысында Иса Байзақов атындағы облыстық филармонияда домбырашылар оркестрі, Қостанай облысында «Шаңырақ» ұлттық өнер орталығы жұмыс жасайды.

«Сонымен бірге Атырау облысында Домбыра музейін, ал Ақмола облысында жергілікті домбыра орталығын ашу көзделіп отыр. Қазіргі таңда елімізде Құрманғазы атындағы ұлттық аспаптар өркестрі және Жамбыл атындағы Қазақ мемлекеттік филармониясы, ұлттық өнер жоғары оқу орындары жұмыс жасайтынын ескере отырып, республикалық деңгейде Ұлттық домбыра орталығын құру мәселесі қосымша пысықтауды талап етеді», - деді Ералы Тоғжанов.

Jańalyqtar

Үрдіс

MURAǴAT