Он мыңға жуық елордалық оқушыға оқу құралдары салынған сөмкелер беріледі

НҰР-СҰЛТАН. ҚазАқпарат – «Мектепке жол» акциясы аясында 10 мыңға жуық елордалық оқушыға ішінде қажетті оқу құралдары бар сөмкелер беріледі. Бұл туралы Нұр-Сұлтан қалалық білім басқармасының басшысы Қасымхан Сенғазыев мәлім етті, деп хабарлайды ҚазАқпарат тілшісі.

«Жаңа 2022-2023 оқу жылында аудан әкімдіктерімен бірлесіп, демеушілік қаражат есебінен 10 мыңға жуық балаға керек-жарақтары бар мектеп сөмкесі берілмек. Оны бірінші кезекте әлеуметтік осал топ санатына жататын оқушылар алады», - деп атап өтті басқарма басшысы.

Республикалық «Мектепке жол» акциясы 1 тамызда басталған. Қазіргі уақытта аталған шараға мемлекеттік органдарды, меценаттарды, демеушілер мен үкіметтік емес ұйымдарды тарту жұмыстары жүргізіліп жатыр.

Еске салсақ, астанада үш ауысыммен істейтін 4, ал бала саны шамадан тыс артық 15 мектеп бар. Ал, оқушы мектепке формасыз келген күннің өзінде, партаға отыруға құқылы .

«Оқу-ағарту министрлігі биыл бірыңғай мектеп формасы міндеттелмейтінін мәлімдеді. Ең бастысы – оқушы білім ордасының қарапайым ережелеріне сай киінсе болғаны. Ескерте кетейін, баланың білім алу құқығын ешкім шектемеуі керек. Егер бала мектеп формасымен келмесе де, оны ұстаз партаға отырғызуға міндетті», - деді білім басқармасының басшысы.