Олимпиада жүлдегері Ольга Рыпакова саяси науқаннан шет қалмады
ШҚО ақпарат орталығының мәліметінше, референдум учаскелерінде елеулі заңбұзушылық тіркелген жоқ. Байқаушылардың барлық ескертуі дереу ескеріліп жатыр.
Мәселен, Семей қаласындағы № 249 сайлау учаскесінде екінші рет дауыс беру фактісі анықталды.
Комиссия төрағасы түсініктеме беріп, байқаушылардың қатысуымен бір бюллетеньді жою туралы хаттама жасалды.
Бұған сайлаушылар тізімдері мен e-gov деректер базасы арасындағы техникалық сәйкессіздік себеп болған.
Ауа райы қолайсыздығына қарамастан өңір жұртшылығы белсенді дауыс беріп жатыр.
Сағат 18.00-дегі жағдай бойынша Шығыс Қазақстан облысында дауыс беруге құқылы азаматтардың 72,76 пайызы бюллетень алды.
Референдумға қатысып, өз таңдауын жасағандардың бірі – қазақстандық жеңілатлет Ольга Рыпакова.
Өскемен қаласындағы №2 учаскеде тіркелген ол дауыс беріп, азаматтық позициясын танытты.
«27 жылдан кейін Конституцияға өзгерістер мен толықтырулар енгізу бойынша референдум өтіп жатыр. Бұл - Қазақстан үшін тарихи оқиға. Референдумға қатысу – әрбір азаматтың құқығы, таңдауы. Мен бүгін осы құқығымды пайдаланып, дауысымды бердім», - дейді үш дүркін Олимпиада жүлдегері.
Естеріңізге сала кетсек, осыған дейін Өскемен халқы өз таңдауын жасап жатқаны жайлы фоторепортаж берген едік.