Облыс әкімі Павлодарда азық-түлік бағасын тұрақтандыруды тапсырды
Қала басшысы 2019 жылы облыс орталығында атқарылған жұмыс нәтижелерін ұсынды. Мәселен, қаланың өнеркәсіптік кәсіпорындарының былтырғы жалпы өнімі 802 млрд теңгені құрады. Бұл, 2018 жылғы көрсеткіштен 2% артық. Аграрлық секторда 2019 жылы 1 млрд теңгеден астам 5 инвестициялық жоба іске асты. Нәтижесінде 100-ден астам жаңа жұмыс орны ашылды. Жыл қорытындысы бойынша ауыл шаруашылығының жалпы өнім көлемі 12 млрд теңгені немесе 2018 жылға қарағанда 116% құрады.
Есептік кездесуге қатысқан облыс әкімі Әбілқайыр Сқақов Павлодар мен Нұр-Сұлтан қалаларының арасындағы азық-түлік белдеуінің орнатылмағанын сынға алды.
«Нарығымызды өз тауарларымызбен қамтамасыз етуге мүмкіндігіміз бар. Кеше Екібастұзда болдым. Сонда өсірілетін қызанақ пен раушан гүлдерінің 80% экспортқа шығады. Осы орайда, бірінші кезекте өз тұтынушыларымызды сапалы әрі арзан ауыл шаруашылығы өнімдерімен қамтамасыз етуіміз қажет», - деді Әбілқайыр Сқақов.
Оның үстіне, өңір басшысы Павлода әкіміне әлеуметтік маңызы бар азық-түлік бағаларын тұрақтандыру мақсатында түбегейлі іс-шараларды қолға алуды міндеттеді. 2019 жылы әлеуметтік маңызы бар 19 тауардың 14-іне баға өскен. Осы орайда Әбілқайыр Сқақов делдалдарды шеттетіп, ауыл шаруашылығы өнімдерін өндірушілермен тікелей келісімшарт жасасу керектігіне назар аударды.