Нұрсұлтан Назарбаев әуежайы 4.5 млн жолаушыға қызмет көрсетті

АСТАНА. ҚазАқпарат - Нұрсұлтан Назарбаев халықаралық әуежайы 2018 жылы 4,5 млн жолаушыға қызмет көрсетті. Бұл көрсеткіш 2017 жылмен салыстырғанда 6 пайызға көп, деп хабарлайды ҚазАқпарат тілшісі əуежай баспасөз қызметіне сілтеме жасап.

2018 жылы Вильнюс, Тюмень Челябинск, Сочи және Душанбе секілді жаңа халықаралық бағыттардың ашылуына байланысты әуежай халықаралық бағыт бойынша 1,8 млн-ға жуық жолаушыға қызмет көрсеткен.

Ішкі бағыттағы жолаушылар көлемі де артып, осы уақыт ішінде 2,7 млн-нан аса жолаушы әуежай қызметіне жүгінген.

Ішкі бағыттағы танымал бағдарлар: Алматы, Шымкент және Атырау қалалары. Сондай-ақ, 2018 жылы Астана әуежайынан 30 мыңнан аса ұшақ ұшу сапарларын орындаған.