Нұрсұлтан Назарбаев Алматы қаласындағы метроның алғашқы кезегінің ашылу рәсіміне қатысты және қайта жөндеуден өткен Республика сарайында болды

None
None
АСТАНА. 1 желтоқсан. ҚазАқпарат. Мемлекет басшысы Нұрсұлтан Назарбаев Алматы қаласындағы метрополитеннің алғашқы кезегінің ашылу рәсіміне қатысты және қайта жөндеуден өткен Республика сарайында болды, деп хабарлайды ҚР Президентінің баспасөз қызметі.

Президент Алматының тарихында метроның алғашқы кезегінің ашылуымен барлық алматылықтар мен метро құрылысшыларын құттықтады. Президент Алматы метросының іке қосылуы - тек автобус бағыттарының қысқаруына ғана емес, жаңа көлік мәдениетінің пайда болуына ықпал ететінін атап өтті.

Метрополитеннің символдық кілтін Президентке бергеннен кейін, Мемлекет басшысы символдық қоңырауды соққан соң, Алматы метрополитенінің алғашқы пойызы орнынан қозғалды.

Одан кейін Мемлекет басшысы метрополитен тоннелі бойынша меторы вагонымен «Райымбек батыр» стансасынан «Алатау» стансасына дейін, жол бойындағы «Жібек жолы», «Алматы», «Абай», «Байқоңыр», «Мұхтар Әуезов атындағы драма театры» тәрізді барлық стансаларды кезекпен-кезек қарай отырып, жүріп өтті.

Алматы метросының құрылысы 80-жылдардың аяғында басталған еді. Құрылыстың толық құны 167 миллиард теңгені құрайды. Метроның бірінші кезегінің ұзындығы - 8,56 шақырым. Бірінші кезектегі бірінші желісінің жобасына электрдепо, инженерлік корпус, қызметкерлер пайдаланатын ғимарат және жеті станса кіреді. Метрополитен құрылысы кезінде барлық негізгі автоматты жүйесінде ең заманауи ақпараттық-телекоммуникациялық технология қолданылған. Метрополитеннің байланысы мен қауіпсіздігін, дыбысталу, технологиялық процестердің автоматты жоғары деңгейін 30-ға жуық қауіпсіздік жүйесі қамтамасыз етеді. Радиоарнаны пайдалана отырып пойыздардың қозғалысын басқару жүйесі бірінші рет қолданылды. Сондай-ақ пойыздардың қауіпсіздігі «Тоннелдер мен метрополитендер» жетекші ресейлік институты әзірлеген және «Бетон унд Мониербау» австриялық фирмасы енгізген станциондық тоннелдер прогресивтік технологиясы, сейсмологиялық тоннелдік құрылғылар қолданыла отырып қамтамасыз етілген.

Бұдан бөлек, ТМД аумағында алғаш рет Алматыдағы жерасты құрылысы кезінде монолиттік темір бетондар негізінде рельстер төсеуде жаңа шпалсыз әдіс қолданылған. Аталған технология қозғалыстың қауіпсіздігі мен қолайлылығын қамтамасыз етуге, сондай-ақ жолдың жоғарғы бөлігінің пайдалану мерзімін ұлғайтуға мүмкіндік береді. Метро мен вагондардағы құқық тәртібін бұзушылықтың алдын алу үшін бейнебақылау жүйесі орнатылған. ТМД елдерінде алғаш рет мүмкіндігі шектеулі адамдарды көтеріп- түсіретін арнайы автоматты тетіктер қарастырылған.

«HyundaiRotem» оңтүстік кореялық компаниясы арнайы әзірлеген электр пойыздардың (әр пойызда төрт вагоннан бар) төрт заманауи құрам метрополитен жолаушыларына қызмет көрсететін болады. Бір құрам 940 адамға арналған. Қозғалыстың орташа жылдамдығы аялдаманы есептегенде, сағатына 40 шақырымды құрайды. Бірінші желінің бірінші кезегі бойынша бір бағыттың соңына дейінгі жол жүру қозғалысы 14-16 минөт.

2011 жылдың наурызында батыс бағыттағы метрополитеннің екінші кезегінің құрылыс жұмыстары басталды. Оның құрамына: «Сайран», «Москва», «Сарыарқа», «Достық», «Қалқаман» деп аталатын бес станса жатады. Аталған тоннель қаланың орталығын Қалқаман кентімен қосады. Оның ұзындығы - 8,62 шақырымды құрайды.

- Бүгін еліміз үшін маңызды осы жобаны іске асырудағы жақсы жұмыстары үшін біздің метро құрылысшыларына, барлық ұйымдастырушылар мен оған атсалысқандарға ризашылығымды білдіремін. Бұл алматылықтардың Тәуелсіздіктің 20 жылдық мерейтойына тамаша тартуы! - деді Президент.

Мемлекет басшысы Қазақстан азаматтарын алда келе жатқан Тәуелсіздіктің 20 жылдық мерекесімен құттықтап, барша қазақстандықтарға бейбітшілік пен келісім, әрбір отбасына амандық-саулық тіледі.

Сонымен қатар, Нұрсұлтан Назарбаев қайта жөндеуден өткен Республика сарайында болды. Мемлекет басшысы көрермен залын аралап көрді. Президент назарына концерттік бағдарлама ұсынылды.

Республика сарайы 1970 жылы салынған. Ғимаратқа 40 жылдай уақыт ішінде алғаш рет жөндеу жүргізілген. Аталған ғимараттағы концерт залында қоғамдық іс-шаралар, съездер мен конференциялар өтеді. Бүгінде ғимаратта қалпына келтіру жұмыстары жүргізілген. Жөндеу жұмыстары кезінде энергияны үнемдейтін технология қолданылған, ғимараттың архитектуралық келбеті жаңартылған, сондай-ақ сейсмокүшейту және өртке қарсы іс-шаралар бойынша жұмыстар жүргізілген. Республика сарайы ғимараты қазіргі заман стандарттарына толық сәйкес келеді. Қазіргі уақытта өңдеу жұмыстары аяқталуда, жабдықтау монтажы жүргізілуде, барлық деңгейдегі қауіпсіздік жүйесі, соның ішінде «антитеррор» жүйесі орнатылуда. Республика сарайы үшін сазды аспаптар сақтауға арналған алаң және үш көтеруші тетікті оркестрлік арнайы ойпаң маңызды жаңалық болып саналады. Сондай-ақ Республика сарайында 50 орындық конференц-зал, сән салоны, аудиодүңгіршек, гүл дүкені, дыбыс жазу студиясы тәрізді жаңа бөлмелер де бар.

Соңғы жаңалықтар