Нұрлы жер: Батыс Қазақстанда 11 көппәтерлік тұрғын үй салынбақшы
БҚО құрылыс басқармасының басшысы Әлібек Антазиевтің өңірлік коммуникациялар қызметі алаңында өткен брифингіде мәлім еткеніндей, сонымен қатар 46 инженерлік-коммуникациялық инфрақұрылым нысаны құрылысы жүргізілмек.
Бағдарлама аясында құрылысқа 18 млрд теңге жұмсалмақшы.
Әлібек Сайынұлының сөзіне қарағанда, биыл 586,7 мың шаршы метр тұрғын үйді пайдалануға беру көзделуде.
Атап айтқанда, 9 көппәтерлік тұрғын үй (1 126 пәтер) және ауылдарды 67 тұрғын үй (379 пәтер) құрылысы жыл аяғына дейін бітпекші. Соның ішінде «Отбасы банк» салымшылары үшін 7 көппәтерлік үй (алтауы Оралда, біреуі Ақсай қаласында, 802 пәтер), ауылда (Тоқпайда) 40 тұрғын үй (240 пәтер) беріледі. Жергілікті атқарушы органдарда кезекте тұрғандар үшін 2 көппәтерлік тұрғын үй (біреуі Оралда, екіншісі Ақсайда, 324 пәтер), ауылдарда 27 тұрғын үй (139 пәтер) іске қосылмақшы.
«Нұрлы жер» бағдарламасы аясында Орал қаласының солтүстік-шығыс бөлігінде және Зачаган кентінде жаңа шағынаудандар бой көтерді. Оған қоса «Ақжайық» шағынауданында барлық магистральдық инженерлік желілер тартылды. Қазіргі кезде 25 көппәтерлік тұрғын үйдің жобалық-сметалық құжаттамасы әзірленіп, сараптамадан өтуде», деді Ә.Антазиев.
Еске сала кетейік, бұдан бұрын Оралда нөсер жауыннан кейін 7 тұрғын үйге су кіргенін жазған болатынбыз.