Нұр-Сұлтаннан Шанхай мен Үрімжіге жаңа әуе рейстері ашылмақ

НҰР-СҰЛТАН. ҚазАқпарат – Нұр-Сұлтан қаласынан Шанхай мен Үрімжіге жаңа әуе рейстерін ашу жоспарланып отыр. Бұл туралы Азаматтық авиация комитеті мәлім етті, деп хабарлайды ҚазАқпарат тілшісі.

Осы орайда елорда әкімдігі мен Азаматтық авиация комитеті Қытайдың ірі әуе компанияларының бірі China Eastern Airlines, сондай-ақ қытайлық бюджеттік компания Urumqi Airlines-пен өзара түсіністік туралы меморандумдарға қол қойды.

Бұл тұрғыда «Нұр-Сұлтан-Шанхай» рейсін 2020 жылдың бірінші тоқсанында ашу ескерілген.

Айта кетейік, осы бағытта әуе сапарларын қазақстандық әуе компаниялары да орындайды.

China Eastern Airlines штаб-пәтері Шанхайда орналасқан. Бүгінде әуе компаниясы әлемнің 177 елінде 1 052 бағдар бойынша жолаушылар тасымалын орындап келеді.