Нұр-Сұлтанға газ тартылған соң жылу бағасы қымбаттайды - Ермек Қизатов
«Жылу тарифі айтарлықтай шарықтап кетпейді. Шаршы метріне алғанда аз ғана қымбаттайды», - дейді қала әкімінің орынбасары.
Оның айтуынша, газбен қамту жобасын іске қосу кезең-кезеңімен іске асады.
«Біз көмірден бірден бас тартпаймыз. Мұның бәрі шамамен бес жыл ішінде жүзеге асады. Сол себепті жылу бағасы бірден қымбаттап кетпейді», - дейді ол.
Сондай-ақ, жеке секторлардың газ немесе көмір қолдануда таңдау мүмкіндігі бар.
«Әкімдіктің мақсаты - газ қолдану үшін барлық жағдайды жасау. Елордада газдың бағасы көмірден арзан болмайды. Оған екі себеп бар, оның бірі - жол шығыны. Көмір Павлодар, Қарағанды сияқты көрші облыстардан алынса, газ кемінде мың шақырымдық жерден тартылады. Газ тасымалдау - айтарлықтай шығыны мол жұмыс. Екінші себеп - қазып алатын көмір мен құбыр арқылы келетін газдың айтарлықтай айырмашылығы бар, сол себепті газ бірнеше есе қымбат болады. Дегенмен, газ тартудың артықшылығы көп», - дейді Ермек Қизатов.
Еске сала кетсек, бұған дейін елордада газ тарату желілерінің құрылысы кезең-кезеңімен жүзеге асырылатынын жазған болатынбыз.