Нұр-Сұлтанда үш мың мектеп оқушысы қоқысты сұрыптау акциясына қатысты
Жергілікті әкімдіктің тұрмыстық қалдықты тастау мәдениетін қалыптастыру бастамасы елордалық оқушылар тарапынан қолдау тапты. Ұйымдастырушылар ел астанасында қалдықты сұрыптап тастауға қажетті инфрақұрылым бар екенін айтуда.
«РОП операторы» ЖШС деректеріне сәйкес, Нұр-Сұлтанда 6 276 сары контейнер орнатылып, қайта өңдеуге жарамды қалдықтарды шығаруға 25 машина сатып алынған. Сонымен бірге, өткен жылдан бері экологиялық білімді арттыру мақсатында халық арасында ақпараттық-ағарту жұмыстары жүруде.
ҚР Экология, геология және табиғи ресурстар министрлігі мен БҰҰ Даму бағдарламасының экологиялық мәдениетті насихаттау сарапшысы, «Ақ Бота» қоғамдық қорының директоры Татьяна Немцан шараға елорданың 87 мектебі қатысып жатқанын айтты.
«Біз дұрыс сұрыптауды қалай жүргізу керектігіне қоғам назарын аударғымыз келді. Акцияға қаланың барлық 87 мектебінің балалары қатысуда. 12 топтағы балалар үздік білім қосымша беру мұғалімдерінің шеберлік сабақтарына қатысады. Эко-сөмке жасау мен басқа да тұрмыстық қатты қалдықтарды өңдеуге арналған сыныптар бар. Жалпы, экологиялық челленджге 3 мыңнан астам бала қатысады. Ең белсенді қатысушылар алғыс хаттар, сыйлықтар және басқа сыйлықтарға ие болады. Оған 1-сыныптан бастап, колледж студенттеріне дейін қатысып жатыр», - деді Татьяна Немцан.
«Сарыға лақтыр!» акциясы аясында студенттер металл, шыны, макулатура қалдықтарын сары жәшікке (қайта өңделетін материалдар үшін) және қайта өңделмейтін қалдықтарды жасыл контейнерге сұрыптап салды, экологиялық сөмкелер тігу және қайта өңделген материалдардан сувенир жасау бойынша шеберлік сабақтарын өткізді.
Алаңда оқушылардың қалдықтарды қайта өңдеу бойынша жобаларының көрмесі ашылып, концерттік нөмірлер көрсетілді.
Атап өткен жөн, қатты тұрмыстық қалдықтарды бөліп тастау жүйесі биыл Ақтөбе, Семей, Түркістан, Өскемен қалаларына енгізіледі.
Жергілікті атқару органдары тұрмыстық қатты қалдықтарды бөлек жинауға арналған контейнерлердің саны, арнайы жабдықтар және сұрыптау желілерінің қажетті сыйымдылығын көрсететін бағдарламалар дайындайды.