Нұр-Сұлтанда күдікті QR код бейнеленген баннерлер жойылды

НҰР-СҰЛТАН. ҚазАқпарат – Нұр-Сұлтан қаласының сәулет, қала құрылысы және жер қатынастары басқармасы елордадағы жарнама баннерлерін тексеріп шықты, деп хабарлайды ҚазАқпарат тілшісі.

«Нұр-Сұлтанда күдікті QR код бейнеленген баннерлер жойылды. Оларға қатысты қосымша мән-жайды құқық қорғау органдары анықтайды», - деп хабарлады баспасөз қызметінен.

«Астанагорархитектура» ЖШС директоры Нұржан Кенжебековтің сөзінше, 11 сәуірден бастап елімізде «Жарнамалар туралы» заңға өзгерістер енгізілген.

«Бұрын жарнама берушілер жарнамалық құрылымның эскиздік жобасын басқармаға бағыттайтын. Инженерлік қамтамасыз ету, құқығын бекітетін құжаттар бойынша шешім қабылданып, осыдан кейін ғана рұқсат берілетін. Қазіргі уақытта жарнама беруші сыртқы жарнаманы ілместен 5 күн бұрын алдын ала салық төлеп, ескертпені басқармаға жолдайды», - деп хабарлайды басқармадан.

Қазіргі мәлімет бойынша, астанада 300 баннер орнатылған. Қаланың Сәулет, қала құрылысы және жер қатынастары басқармасы оларды түгендеп жатыр.

Еске сала кетсек, бұған дейін Алматыда есірткіні жарнамалаған баннердің қалай пайда болғанын әкімдік түсіндіріп берген еді. Сондай-ақ, полиция қызметкерлері даулы баннерді ілгендерді іздестіруге кірісті.

Ал Ішкі істер министрлігінің Есірткі қылмысына қарсы іс-қимыл жөніндегі департаменттінің хабарлауынша, тексеру нәтижесінде ел аумағында осындай 8 баннер анықталып, алынып тасталған.