Нұр-Сұлтанда кинотеатрлар мен мешіттер жабылып, көпшілік шараларға тыйым салынды
2022 жылғы 12 қаңтар 18:25

Нұр-Сұлтанда кинотеатрлар мен мешіттер жабылып, көпшілік шараларға тыйым салынды

НҰР-СҰЛТАН. ҚазАқпарат – Елордада эпидахуалдың нашарлауына байланысты театр, кинотеатр жұмысы тоқтатылды. Одан бөлек, көпшіліктің қатысуымен өтетін шараларға тыйым салынды. Бұл туралы Нұр-Сұлтан қаласының бас мемлекеттік санитар дәрігері Сархат Бейсенова мәлім етті, деп хабарлайды ҚазАқпарат тілшісі.

«Бүгіннен бастап менің жаңа қаулыма сәйкес, елорданың «қызыл» аймаққа қайта енуіне байланысты ғимарат ішінде және сыртта көпшіліктің қатысуымен өтетін шараларға тыйым салынады. Оның ішінде отбасылық және басқа да мерекелік іс-шаралар бар. Ал еске алу шарасын «Ashyq» жобасына қатысатын мекемеде өткізуге болады. Бірақ 30 адамнан артық жиналуға болмайды», - деді Сархат Бейсенова қала әкімдігінде онлайн өткен баспасөз мәслихатында.

Сондай-ақ, бас санитар дәрігер бірнеше әлеуметтік нысанның қызметіне тыйым салды.

«Ashyq» жобасына қатысатындығына қарамастан концерт зал, филармония, театр, кинотеатр, цирк қызметіне тыйым салынады. Және жұртшылықтың қатысуымен өтетін жұма намаз басқа да діни шаралар өткізуге рұқсат жоқ. Одан бөлек, конференция, семинар, форум өткізу мен караоке, түнгі клубтардың жұмысы тоқтатылды», - дейді ол.

Сонымен қатар елордада тамақтану орындарында бардың қызметіне де тыйым салынды.


Автор:
Тілші

Jańalyqtar

MURAǴAT