Нұр-Сұлтанда қазақ тарихына арналған екі кітап таныстырылды
Ғалымдардың бұл еңбектерінде Қазақстанның көпғасырлық тарихи, мәдени мұрасын сақтау, терең зерделеу және ұғыну, оның өзекті кезеңдерін, халық тарихы мен ел болашағына үлкен әсер еткен бейнелер мен есімдерді ашу қажеттігі туралы Елбасының «Болашаққа бағдар: Рухани жаңғыру» және «Ұлы даланың жеті қыры» атты бағдарламалық мақалаларының идеялары жүзеге асырылған.
«Бұл кітап жаһандық ғылым, әлемдік шығыстану тұрғысында қазақтардың, қазақ халқының әлемдік тарихтағы орны мен рөлін айқындауға арналған. Сонымен қатар, аталған еңбегімде көшпелі халықтардың ішіндегі қазақтардың орны мен рөлін, өзге көшпелі халықтардан ерекшеліктерін көрсетуге тырыстым», - деді «Әлемдік ориенталистикадағы Қазақстан» кітабының авторы, саяси ғылымдар докторы, профессор Мұрат Лаумулин.
Айта кетерлігі, бұл кітапта ғалымның 30 жыл бойы тірнектеп жинаған еңбектері жинақталған.
Ал тарих ғылымдарының докторы, профессор Клара Хафизованың «Степные властители и их дипломатия в XVIII-ХІХ веках» монографиясы қазақ мемлекеттілігін, аумақтық тұтастығы мен ұлттық бірлігін сақтау бойынша екі ғасыр ішінде Қазақ хандығы билеушілері үш ұрпағының қызметіне арналған.